छ. शिवाजी महाराजांचे कार्य फक्त एका दिवसापुरते मर्यादित न राहता त्याची महती, कार्यपद्धती, विचारधारा अशा अनेक पैलूंचे दर्शन सातत्याने समाजासमोर यावे आणि कृतीमध्ये सुयोग्य बदल होऊन छत्रपतींना अपेक्षित असलेले स्वराज्य निर्माण व्हावे.

महाराजांचे स्मरण फक्त त्यांच्या प्रतिमा/मुर्तीपुजनात न अडकता महाराजांवर असलेल्या प्रेमाला योग्य दिशा दिली असता समाजातील ही उर्जा सकारात्मकरित्या काही भव्य घडवू शकेल असा संस्थेचा ठाम विश्वास आहे.

हा कार्यक्रमाच्या आयोजकांपैकी कोणीही स्वत:ला इतिहास या विषयातील तज्ञ/जाणकार समजत नाही. तसा त्यांचा कधीच दावा असणार नाही. शिवाजी महाराजांच्या उपलब्ध असलेल्या अनेक शिवचरित्रांपैकी कोणत्याही शिवचरित्राचा ही संस्था पुरस्कार वा प्रतिकार करत नाही. सर्व शिवचरित्र संस्थेला वंदनीयच आहेत. त्यात मांडलेली तथ्ये, घटना यांची सत्यासत्यता फडताळण्याची संस्थेकडे यंत्रणा नाही. आणि तो संस्थेचा उद्देशही नाही.

केवळ शिवाजी महाराजांमध्ये असलेले गुण समाजातील युवा वर्गामध्ये पोहोचावेत, त्यांनी त्या गुणांचा आदर्श घेऊन त्याचे अनुकरण करण्याचा प्रयत्न करावा तसेच त्यानिमित्ताने संतूलीत पर्यावरणाच्या कार्यालाही थोडा हातभार लागावा असा या प्रकल्पाचा मुख्य उद्देश आहे.